Sunday , July 22 2018

Turqi: Shkarkohen 18 mijë administratorë në institucione të ndryshme

Turqia lëshoi një dekret këtë të dielë, përmes së cilit do të shkarkohen nga puna më shumë se 18 mijë nëpunës civilë, gati gjysma e të cilëve janë nga radhët e forcave policore, pikërisht përpara heqjes së mundshme gjatë këtij muaji të gjendjes së emergjencës, të vendosur prej dy vitesh, që pas përpjekjes së dështuar për grusht shteti të korrikut të vitit 2016.

Dekreti vjen pas fitores së presidentit Recep Tayyip Erdogan në zgjedhjet presidenciale të muajit të kaluar, e vetëm një ditë përpara se ai të bëjë betimin, tashmë në krye të një presidence të fuqishme ekzekutive.

Dekreti në fjalë shkarkon 199 akademikë nga universitetet anembanë vendit, sikurse më shumë se 5.000 pjesëtarë të Forcave të Armatosura. Autoritetet turke në fakt, sipas asaj që deklaroi zyra e të Drejtave të Njeriut në OKB gjatë muajit mars kanë shkarkuar që prej puçit të dështuar ushtarak rreth 160 mijë nëpunës civilë. Mes të ndaluarve apo të paraburgosurve, më shumë se 50 mijë vetë janë përballur me akuza formale dhe janë mbajtur në qeli edhe gjatë gjykimit.

Aleatët perëndimorë të Turqisë kanë kritikuar ashpër këtë fushatë spastrimi. Kritikët e presidentit Erdogan e akuzojnë atë se po e përdor grushtin e dështuar të shtetit si pretekst për të shtypur disidentët. Turqia, nga ana tjetër shpjegon se masat janë të nevojshme për të luftuar kërcënimet ndaj sigurisë kombëtare

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.